محتوي المسدج موجود كفيديو مسجل ممكن تشوفه هنا، خلي بالك ان الفيديو خاص بالسنة اللي فاتت، الاختلافات ان:
1- مش لازم نخش ال ACPC Kickoff Contest
2- مصاريف التسجيل للفريق الواحد 1500 جنيه لسنة 2026، يعني 500 جنيه للفرد.
https://www.youtube.com/watch?v=bInUX_kqWAM
في البوست ده هنتعرف على اغلب ما يخص المسابقة وهنجاوب على أغلب الاسألة اللي ممكن تتسأل وهيكون مثبت في البيدج هنا لحد المسابقة كمرجع ليكم، ولو حد عنده سؤال يبعتلنا على البيدج.📌
🔻 ايه هي مسابقة الـ ICPC ؟ مسابقة الـ ICPC العالمية هي اكبر مسابقة برمجية تنافسية علي مستوي العالم لطلاب الجامعات وعشان تقدر توصل ليها لازم تمر بشوية مراحل.
🔻 إيه هي مراحل المسابقة؟ 1️⃣ اولًا: مرحلة الـ ECPC qualifications ودي البداية بتكون على مستوى الجامعة في التنافس كلنا بنشارك فيها ونتنافس عشان يتأهل مننا نسبة مُعينة للـ ECPC. 2️⃣ ثانياً: مرحلة الـ ECPC ودي بتكون على مستوى جامعات مصر كلها بيشارك فيها النسبة المُتأهلة من كل جامعة في المرحلة الأولى وبيتنافسوا عشان يتأهلوا للـ ACPC. 3️⃣ ثالثاً: مرحلة الـ ACPC ودي بتكون على مستوى العرب وأفريقيا بيشارك فيها الفرق المتأهلة من كل دولة على مستوى العرب وأفريقيا عشان يتنافسوا على التأهل للمرحلة الأخيرة وهي الـ ICPC World finals. 4️⃣ المرحلة الاخيرة: الـ ICPC world finals ودي بتكون على مستوى العالم وبيشارك فيها الفرق اللي عدت بالـمراحل التلاتة السابقة. 📊 كل مرحلة من المراحل السابقة بيتوفر لكل فريق عدد معين من المسائل عادة لا يتعدى الـ 13 مسألة وبتكون مسائل متنوعة في الصعوبة من السهل جدا لحد الصعب وبيكون كل فريق معاه جهاز كومبيوتر واحد فقط ومدة المسابقة 5 ساعات. 🟡 قبل كل مسابقة بيكون في مسابقة مصغرة اسمها practice contest الهدف منها تتعودوا على نظام المسابقة وازاي ممكن ترفعوا حلولكم او تطبعوا حاجة محتاجينها وازاي مثلا ممكن تسألوا في المسابقة والتعامل عموما مع الجهاز. 🎈 كل مسألة بيكون ليها لون معين لو حليت المسألة بيحطوا عند الجهاز بتاعكم بلونة بلون المسألة المحلولة وبتاخدهم وانت ماشي.
🔻 ميعاد المسابقة امتى؟ بإذن الله الـ ECPC Qualifications هتكون في فترة ما بين نص شهر 7 ونص شهر 8 وبتستمر اسبوع تقريبا.
🔻 هل بنحضر المسابقة كل الايام دي؟ لأ، هو يوم واحد فقط، عدد الايام دي لباقي جامعات مصر، فـ كل جامعة/جامعات بيكون مخصص لهم يوم واحد.
🔻 جامعة حلوان أنهي يوم؟ لسه متحددش، ولما يتحدد هنبلغكم.
🔻 مكان المسابقة فين؟ المسابقة بتتعمل في الأكاديمية البحرية للعلوم والتكنولوجيا في إسكندرية.
🔻 إيه شروط التسجيل في المسابقة؟ لازم تكون طالب مُقيد فى أي كليـــة تابعة لجامعة حلوان (العاصمة حالياً).
🔻 المسابقة فردية ولا فرق؟ فرق، وكل فريق بيتكون من 3 متسابقين ولازم يكونوا 3 ولازم يكونوا من نفس الجامعة وفي حالتنا لازم يكونوا من جامعة حلوان (جامعة العاصمة حالياً).
🔻 هانروح ازاي؟ ان شاء الله هنوفر اتوبيسات ذهاب وعودة من القاهرة لحد الاكاديمية في اسكندرية يوم المسابقة وهنعلن تفاصيل الاتوبيسات قبلها.
🔻 ينفع اروح قبلها ومروحش مع الاتوبيس؟ والله يكون افضل يعني 😂، لا بجد لو قدرت فعلا اعمل كده وروح قبلها بيوم بحيث تستريح من السفر وتهدي اعصابك في اسكندرية كده عشان تاكل المسائل تاني يوم.
🔻 مصاريف المسابقة كام؟ المبلغ الكلي للفريق 1500 جنية مصري.
🔻 لو أنا شخص جديد في الـ problem solving اقدم ولا أستنى؟ لو استنيت السنة دي هتسأل نفس السؤال ده السنة الجاية، اللي لسه مبدأش لسه فيها وقت تبدأ واللي واقع منه حاجه لسه عنده وقت يستدرك ما فاته، ثم أنه المسائل بتكون متدرجة في الصعوبة فـ بمجهودك والتدريب اللي بنوفره وتوفيق ربنا قبل أي شئ هتقدر تحل.
🔻🔻 نعمل إيه عشان نسجل؟ مبدأيا لازم تكون من جامعة حلوان (العاصمة حالياً) لو هتسجل تبعنا، غير كدا ارجع لـ community الجامعة بتاعتك.
١. محتاج تطلع اثبات قيد موجه لمسابقة ECPC بيطلع من شؤون الكلية.
٢. محتاج تعمل اكونت علي موقع https://icpc.global/
ودا فيديو بيشرح ازاي تسجل عليه بالتفصيل